Հայոց ցեղասպանության 109-րդ տարելիցին նվիրված ոգեկոչման արարողություն Լե Լիլա քաղաքում

20 ապրիլի, 2024

Ապրիլի 20-ին Փարիզի մերձակա Լե Լիլա քաղաքում Հայոց ցեղասպանության նահատակների հիշատակը հավերժացնող պուրակում տեղի ունեցավ Հայոց ցեղասպանության 109-րդ տարելիցին նվիրված ոգեկոչման արարողություն՝ Ֆրանսիայում Հայաստանի դեսպան Հասմիկ Տոլմաջյանի, Սեն Սեն Դընիի փոխպրեֆեկտ Սեսիլ Ռաքեթի, Լիլայի քաղաքապետ Լիոնել Բենարուսի, Սեն Դընի դեպարտամենտի նախագահ Ստեֆան Տրուսելի, նահանգային, դեպարտամենտային և քաղաքային իշխանությունների ներկայացուցիչների, «ԱՆԻ» ֆրանսահայ համայնքային կազմակերպության նախագահ Աիդա Ասադուրյանի, ֆրանսահայ ճանաչված պատմաբան Կլոդ Մութաֆյանի, ֆրանսահայ համայնքի ներկայացուցիչների, հայ և ֆրանսիայի ու հոգևոր ներ մասնակցությամբ։

Իր խոսքում դեսպանն ընդգծեց ցեղասպանության զոհերի հիշատակի ոգեկոչման և միջազգային ճանաչման կարևոր դերակատարությունը՝ որպես մարդկության դեմ ոճրագործությունների կանխարգելման և անպատժելիության դեմ պայքարի կարևորագույն միջոց։ Դեսպանը նշեց, որ 1915թ. ցեղասպանությունից ավելի քան մեկ դար անց հայ ժողովրդի գոյությունը կրկին վտանգված է իր բնօրրանում՝ վկայակոչելով 2023թ. սեպտեմբերին Ադրբեջանի կողմից Լեռնային Ղարաբաղի էթնիկ զտումը՝ բնակչության բռնի տեղահանման միջոցով, ինչպես նաև Հայաստանի Հանրապետության դեմ շարունակվող ոտնձգություններն ու սպառնալիքները։

Միջոցառման ընթացքում ելույթներով հանդես եկան Սեն Սեն Դընիի փոխպրեֆեկտ Սեսիլ Ռաքեթը, Լէ Լիլայի քաղաքապետ Լիոնել Բենարուսը, ֆրանսահայ համայնքային ԱՆԻ կազմակերպության նախագահ Աիդա Ասադուրյանը։

Արարողությանը ծաղկեպսակներ զետեղվեցին նաև Ֆրանսիայի Իլ դը Ֆրանս նահանգի նախագահ Վալերի Պեկրեսի և Սեն Սեն Դընի դեպարտամենտի նախագահ Ստեֆան Թրուսելի անունից:

Միջոցառմանը հնչեցին Շարլ Ազնավուրի «Նրանք ընկան» (Ils sont tombés) երգը, ինչպես նաև Դլե Յամանի մեղեդին՝ դուդուկի կատարմամբ:

Արարողության ավարտին կատարվեց ոգեկոչման աղոթք՝ ի հիշատակ Հայոց ցեղասպանության զոհերի, հնչեցին Հայաստանի և Ֆրանսիայի պետական օրհներգերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր